منتــدى بــويـــه
 
الرئيسيةس .و .جبحـثالأعضاءالمجموعاتالتسجيلدخول

شاطر | 
 

 رواية ليتني ولد كوميديه رائعه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
لي شموخن محدن يطوله

avatar

انثى عدد الرسائل : 269
العمر : 20
الموقع : بيت ابوي
المزاج : طبعي كذآ عنيدة وأعآند من يعآندني واللي برآسي أسويه و ماجابته امه اللي يفرظ كلمته علي ...
تاريخ التسجيل : 17/11/2012

مُساهمةموضوع: رواية ليتني ولد كوميديه رائعه    الأحد ديسمبر 09, 2012 5:16 am


[size=18]صباحكم حب وحساسه / مساءكم ورد وريحاته
هذي رواية ليتني ولد كوميدية
/
اتمنى تحبوها نفس ماحبيتها
وتفطسوو عليها ضحك نفس مافطست اناا
اممممممم
للامانه الرواية منقوله
هذا اول موضوع انزله بالمنتدى بس لي مشاركات
ووووووبس
قراءه ممتعه ان شاء الله
سلام

نبدأ

( البارت الاول )

نادتني ابله تماضر استلم شهادتي .. هاتس شهادتس يالدافوره أهب عليتس ومبروك النجاااااااااااااااح
أنا ودموع الفرح تبارق وسط عويناتي استلمت شهادتي وانا فرحانتن بقوه بقوووه وفاكه خشتي لدرجة ان اللي يمرون جنبي يشوفون معدتي حتى أبلة العلوم بغت تحطني بالمعمل تشرح علي الجهآز الهظمي بس لعبت عليهآ قلت الجهآز فيه فآيروس يبيله فورمآت من قدي أجل ناجحه ونسبتي 98,88% وتقديري منتاز وترتيبي الثالثه على بنات فصيلتي قصدي فصلي رجعت البيت وانا الأرض ماتشيلني من الفرحه حتى من الوناسه قعدت اركض بالشارع والبرقع واصل نص الجبهه ..
دخلت البيت وانا راسمه على شفاتي ضحكه ولا ضحكة عمر اللي مع كابتن ماجد ..
لقيت أهلي جالسين بالصاله كالعاده أخوي : يطقطق بجوالاته
وأمي ماسكه التلفون تكلم تقول انها تكلم كوندليزا رايس عشان تعزمها على عرس اخوي المنحرف وذيك تقول مرتبطه ماتقدر تجي انا داريه من شفتها لابسه التنوره الحمرا وبوش يغني لها ...مئصر تنوره دريت ان ليلتها موب معديه على خير بس تبون الجد انا لاشفتها بالاحمر اسعبل احس اني اشوف كيت كات ابوووك يالالوان << وينك يامقاول الحاره

وابوي منسجم مع قناة غنووه << فاشلين مدري من وين طلعت من بينهم وجبت هالنتيجه
قلت : باركوووووووووولي .. نجححححححححححححححت
أمي / تأشر لي بيدها يعني اصبري .. حرمه ومسكت تلفوون غلطانه اناماعرفت أختار الوقت المناسب
أبوي / خابر انتس بتنجحين ولا بعد ناويه تصقطين ؟؟؟؟!!!!
أخووووي / أوووووخص وش عندها المصريه قولي بس من انتي سارقه شهادته ؟؟ ... ماش مافيه اسلوب ابد ولا تعبير عن الفرحه اجل هم مايسمعون بالمشاركه الوجدانيه << وش عندهاااااااااااااا؟ ولا يبوننا ننحرف بعد!!
بعد الفرحه العارمه << وخروا عني مدري من وين جبتها لحد يذب
دخلت غرفتي وانسدحت على سريري وحطيت رجليني عالجدار << وجه وحده ماسكه ملف اخضر تقوول ياااااه اخيرا خلصت الثانوي
جلست اتذكر طفولتي الحالمه اللي عشتها مابين نيوزلندا وتايلندا و فنلندا << اسامي بناتي ان شاءالله
أتذكر اول يوم بالابتدائي والبنات اللي كنت اصفقهم , واتذكر يوم كبرت شوي وصرت جدعه وكشخه شوي آخذ ريالين بالفسحه وعصير << عشان افقع العلبه لاخلص وإذا صرت كشخه مره مره مره ولا احاتسي احد ابد سوت لي امي ساندويتش كبدة حاشي نص استواء , واتذكر عاد يوم بلغت سن الرشد وصرت بالمتوسطه وبدت ترتسم ملامحي الأنثويه وطلعت الحبوب بالخشه صاير وجهي كنه فقع زبيدي ولبستني امي برقع تعرفون عيال حارتنا عيونهم زايغه وانا مره اهبل << ايقونه تقول وش تقرب لك عايشه الكيلاني>>لاتصدقون عأد اصفقكم
في تلك اللحظات تذكرت خويتي ورفيقة دربي وبنت جيراننا (( عبيطه)) وهي الصديقه المقربه من بين صديقيني وصديقاتي كلبوهم لابوهم لابو من جمعهم السرمدان << قلبت
كنت انا وياها اذا طلعنا من المدرسه ندور تحت الشموس نبحث عن السمار الشرقي واللون البرونزي ذو اللمعه الرماديه والله ياكنا شهبان لهبان لو تكتبون علينا بطامس ماتعوق معكم
بس انا كان لي هدف كنت ابي اوحد اللون عشان احط نعومي كامبل بكمي .. واذا جا نهاية الاسبوع نطلع من المدرسه ونروح نلعب مصاقيل مع عيال جيراننا السواريه كان عندهم ولد الله ياخذ عيونه الزرق كنت اجيه واساله اقوله الحين انت عيونك زرق عشان ابوك معبي الطابعه قصدي امك حبر شاريه من جرير يقوولي أي اكيد ولو لكان ليش عيون اختي خضر اكيد ان اللون الأزرء خِلِص من عندو لبابا.. وأروح عند ابوي أقوله ترا جرير مسوين تخفيض على الحبر الملون وانت مآتعرف إلآ الأسود عشآنه أرخص يعني؟؟
وفي ذاك الوقت يعني ايام الصبا والحب العذري كنا نتشابه كثيييييييييير بالشكل حتى الجرح اللي براس خشمي من الرصيف يوم جاوبت على خشتي عند صقيقتي مثله ..
هذا غير الشرايط اللي كنا نلبسها ايام ماكنا نحط قرنين وعلينا من الاربعا الين نتروش يوم الجمعه ابن امه يفكها كنت احس اني سيكل ابو ثلاث كفرات لدرجة إن اللي يشوفنا يحسب إنه واقف عند الحسين للألعاب وكان مناحي ولد جيراننا كل مامر علي قال اغدي سيكل يركبه المزيون وكنت أضحك له ضحكة برآءه بس بيني وبينكم مقدر اضحك بقوه لأن الأعصاب كلها مشدوده مع البكله أحس جبهتي بتنقسم نصيين
دقيت على خويتي ولقيتها نايمه ارسلت لها رسآلة وسائط فيها صورة واحد يكب مويه إلا يوم صحت ودقت علي وهي تمسح خشتها : خير خيير وش تبين ياصباح القلق
أنا:/ ألوووووهآآآآآآآآآآآ .. هلا هلا هلا والله حيا الله النفسيه قومي يالله النتايج طلعت
عبيطة:/ طلعت وين راحت ؟؟
انا :/ ياسمجك قوم شوفي نتيجتس !!
عبيطه :/ وين اشوفها فيه لاني نسيت وين واعدتها بعدين محنا ناقصين هيئه وفضايح يالله باي بنام .
انا:/ ضفي يور فيس جعلتس تصقطين يالداشره
عبيطه:/ هذا اللي قدرتي عليه .. مالت عليتس بدال ماتقولين بقوم الحين انقز اجيبها لتس تدعين علي بالموت ولا سمني ؟
امحق صديدزه يالله مناك بس
أنا :/ الشرهه موب عليتس إلا على اللي داقتن عليتس حتى ماسألتيني عن نتيجتي << وجه وحده تتلزق تقول أسألوني كم نسبتي
عبيطه:/ إيه صح العتب عالنظر ياخيتي .. هاه ماقالولتس متى الدور الثاني ؟؟
انا:/ دور ثاني تطيحين من فوقه قولي امين .. أنا نجحت ونسبتي 98.88% وترتيبي الثالثه وتقديري منتاز<< ياليييييييل
عبيطه/أقول انتي متأكده إنهآ موب شهآدة حكمت مصطفى؟
أنآ:لا حكمت شوفيهآ منصرعه بالمدرسه عشانهآ جابت 99%
أنتهت المكالمه بعد ماصدقتني وبغت تنظلني واتفقت انا وياها بعد ماتاخذ نتيجتها تمرني عشان نتفق وش راح نسوي بمستقبلنا الواعد
بعد صلاة العشا اجتمعنا بالوكر حقنا وكان الجو راااايق خصوصا اننا ناكل شابورة وشاهي وكيت كات اربع اصابع << خخخخخخخخخ
ومعنا رابح . موب معنا معنا لا بس كنا نسمعه اما لو انه معنا كان سحبت عليكم هع هع

أنا هاه ياعبووطتي وش رايتس على هالنتايج ماودتس نسجل بالطب؟
عبيطه:/ تبين الجد انا ابي اصير دكتورة نسا وولاده والله ياني بجيب لتس مقاااااطع
انا :/ ابد افلقيني ان حملت حرمه وحده عقب ماتتوظفين
بدا التسجيل ولفينا على جامعات الرياض اللي تسوا واللي ماتسوا حتى كلية الملك فهد الامنيه قدمنا عليها قالو مانقبلك عشان لك سوابق عند نقاط التفتيش والحربيه قبلوني مبدأي بس عقب انا اللي عييت اجل يبون يحلقون شعري ؟؟؟؟
رجعنا البيت وحنا خايبين محد قبلنا وانا والله فاحت تسبدي الحين يوم اني افلحت وجبت نسبه ماقبلوني لو اني ماجبت نسبه زينه كان هانت
مرت الاجازة وبدت الدوامات وبدا الطفش وقعدة البيت والفرااااغ قتااااااااااااااااااااااااااااااااال
في يوم الأربعاء 10 شباط تموز يناير لويس التاسع عشر
عبيطه:/ أقول إبره ..!! دامنا جالسين تسذا لاشغل ولا مشغله والطفش لاعن ابو خيرنا عندي فكره ماتخرش منها الميَه
انا:/ قولي ياحبة عيني عساتس تروحين فدوتن لي
عبيطه:/ آمين .. أنا أقول وش رايتس دامنا فاضين نصير عيال عشان نقدر نروح ونجي ونسوق ونقعد عند عتبة الباب << احسد العيال على هالجلسه
أنا :/ لا معليش ماني بفاضيه عيادات وعمليات تجميل وتغير نوع .. انا من يومني برابع جيم وانا احلم اصير ربة منزل واخلَف عيال وازين الغدا لابونا وهو يهاوشني ثم ازعل واروح لاهلي اتغلى وهو يراضيني ويقول لي انتي حبي الاول والاخير انتي ام العيال.. لا لا لا روقيني تبيني الحين اصير ولد وافقد هاللحظآت الحانيه ؟؟

(البارت الثاني)

عبيطه:/الله ياخذك على هالمخ قولي امين .. ترا الدعوه مايبيلها شي راس مالها ثوب وشماغ ولحيه
انا :/ طيب اكيد مايصير لي شي ثاااااني ؟؟؟؟؟؟؟؟؟يعني هه ولآ هه <<تحرك يدهآ
ترا على مسؤليتك !!
عبيطه اقول انتي ماقبلناتس بنت تبنا نقبلتس ولد يختي جربي حظتس يمكن لاصرتي ولد يمشي سوقتس
انا :ممممم تصدقين كنها جازت لي فكرتس .. والله انتس احيان ياعبووطتي تعجبني افكارتس وتصيرين اذكى مني مع اني اشطر منتس
عبيطه:/ اقول لا يكثر تعالي بس خلينا نخطط ونرتب للموضوع صوووووح عشان اصير ولد كايف
انا :/ لا وع موب حلو اسم كايف اختاري اسم احلى
عبيطه/انآ بفهم انتي من وين تفكرين؟
أشرت فوق وانا أحرك حواجبي: من هنآ
وأشرت هي تحت وقآلت لاوالله إلا من هنآ <<طووووط
سهرنا ذيك الليله وما امسينا واستانسنا وااااااجد مررررررررررره اكثر شي بالحياة


اليوم الثآني..
نزلت بسررررررررعه وانا اتزحلق عالدرابزين بس الحمدلله الله ستر من الكوره اللي بآخره سحبت بريك قبل أوصلها
انا :/ يمه .. يمآآآآآآآآآآآآآآآآآه .. أمي .. أمآآآآآآآآآآآآآآآآآآآه .. ماي ماذر
أمي : وجع وجع قصري صوتس لايسمعونتس اللي بالمنتدا
انا : لا ماعليتس يمه كني بديت امون عليهم وسعي صدرتس
امي : زين زين اجل سلميلي عليهم
انا : امي تسلم عليكم وتقول عطونا قدرنا خخخ << خارج النص
انا : يمه ابي اروح لعبيطه بنت جيراننا
امي : لا وشهوله الروحات والجيات وقلة الحيا تراني مانيب اداني البنت اللي عباتها فوق راسها وتتسكع بالشوارع << اتعب يايمه على تتسكع
انا : يمه تكفييييييين هي جاتني امس تخيلي ما اروح لها اليوم وش يصير فيني << مسويه دلوووعه يمه يلا عاد بلا سخافه قولي ايه وفكينا لآ أحشرك الحين ورآ الحوش
امي: لااا انا قلت لا يعني لاااااااااااا
انا : طيب والله لوريكم بكره لاصرت ولد اذا ماسحبت عليكم ورحت بانكوك ماكون ولد ابوي << كني خشيت جو
لحوووول حتى نجاحه ماعطووني .. ماتذكر عطوني نجاحه اصلا الا يومني بأول ابتدائي شرالي ابوي حبتين غوايش دقة عبدالغني بعد وقعدت بيدي الين كبرت وماطلعوها مني إلا بزراديه ابووك يالعنف
رحت لغرفتي وانا اندب حظي المنسدح باللفه بس ترا موب خوينا والعبره ناشبتن بخشمي ودقيت على عبووطه وشكيت لها الحال ياعارف الحال ولو ماتبيني كان ماتسال وراي وش صار شدعوه شقلنالك قالت لي ماعليتس انا بجيتس الليله اهم شي عيون الحلوين لاتدمع
انا / خلاص وه بس وه بدينا غزل اجل بكره لاصرتي ولد وش بتسوين ؟؟ من الحين اقولك طلعه معك لمكان خاص مافيه بس اذا بمكان عام اوكي ماعندي مانع ولا تلمسيني اوكي ياقلبي
عبيطه: اللي تبين ياقبلة الله على الي شافته عيني اهم شي راحتس يابعد كل السحالي
يوم أظلم الليل والليل ابو الاسرار جاتني عبيطه ودخلنا غرفتي وقفلت الباب بس ماسوينا شي خخخخخ
وطلعت لي المفاجأه قالت: وش راااااااااااااايك؟؟؟؟؟
انا :: لااااااااا وش ذااااااااااااا ؟؟؟؟؟؟؟ ياحبيلك ياخويتي العزيزه الله لايحرمني منك ومن حلاك ومن دلالك معقوله جبتي الثوب والشماغ بلهسرعه؟؟ والله انك كفوووووووووو
عبيطه : يامال العنقز قصري صوتس لاتفضحينا .. اسمعي انا مقدر اطول عندتس بس ترا بكره بنبدا بالتنفيذ ولا تنشبين بحلقي تقولين خايفه ومدري وشو من الحين علمتس بس لازم نحدد مكان نروح له
انا : نروح لبقالة ابو سعيد .. وش رايك ؟؟
عبيطه :مالت عليك خويه .. الحين لابسه ثوب وشماغ ومسويه زحمه عشان تروحين لبقاله تقدرين تطمرين عليها مع الدريشه؟؟؟؟؟؟؟
انا : طيب خلاص لاتعصبين L بكره وعدنا بعد صلاة العشا عند برادة المسجد ونشوف وين نروح وقتها
عبيطه : ok
من الفرحه مانمت ذيك الليله بس اتخيل شكلي وانا ولد يعني بطلع حلو ولا لا؟ ياربي من بصير اشبه مهند ولا لاعب الهلال الجديد مدري وشسمه؟؟ البنات بيخقون معي ولالا ؟ ألبس تي شيرت ولا البس قميص واطلع شعر صدري ؟؟
حضنت دبدوبي وعطيته بوستين ونمت
اليوم اللذي يليه :
المغرب دخلت اتروش وخففت الشنب وخليت الزلف إلى الحنتس وضبطت السكسوكه ..<< ترا كل الدعوه سويتها بالكحل انا عارفه بعضكم بيقول وش هالنصابه قلت خل اعلمكم
طلعت من الحمام وانا لافه المنشفه على خصري ولبست سروال سنه ويوم جيت البس الفنيله توهقت وش اسوي ياربي يعني مافيه بوكسر من فوق ؟؟؟؟
المهم اني لبست ويوم جيت عند الشماغ توهقت بعد بشعري وين اوديه ؟؟؟؟؟؟؟
يالله الدعوه بتمشي من بقى اصلا ماطول شعره ؟؟ استغفر الله حتى اللي شعره عراده يطوله ثم يفرده والله لو يصير تسونامي ماتحرك ابفهم ليه يطولونه ؟؟ صدقوني ترا اوب حلو وعععععع احس لو ادخل يدي جوا شعرهم بطلعها وومعي خروف واصابعي معفطه<< تتابع افلام كرتون واجد
لفيت الشماغ عمامه إماراتيه تصدقون صرت اشبه فزاع ؟؟ وشغلت المسجل بغرفتي بصوت عااالي وخليت موضي الشمراني تصدح بصوووتها يعرفوني اهلي راعية زار<< على فكره السالفه للتمويه
قفلت باب الغرفه ونزلت وانا العب بالسبحه وادندن
مريت على امي بالصاله .. قلت يمه تبون شي وانا راجع ؟؟
أمي : لا ابد سلامتك ياولدي بس توقع لاتسرع
ياحليلها امي تحسبني اخوي
طلعت لقيت عبيطه واقفه عند المسجد تحارش القطاوه بالبدايه شكيت هي خويتي ولا لا قلت خاف اروح احاكيها تطلع اوب هي بس تاكدت يوم شفتها حطت ايديها بيجبها وشدت الثوب من ورا وقامت تمشي بتسكع هذي حركتها دايم بالمريول
قلت: يا اووم الشباب ياهووه يامزيووون ارحمنا
التفتت علي وقالت مين ابره؟؟؟؟؟؟؟
انا : ابره ضربوها بوركتس قولي امين لاتقولين ابره تفضحينا انا (( فزآع ))
عبيطه : امممممممممممما فزاع مره وحده يختي قولي حربي العامري قولي ميحد حمد اصدقتس
انا : اقول روحي وراتس انتي وذا الاقلام اللي كاشخه فيها صايره كنك مقلمه مابقى إلا الطامس ماحطيتيه
إلا صدق انتي وش اسمتس؟؟\
عبيطه : انا ابي اسمي ( دل بيرو ) << ماتلعب ابد
انا : والله على هالقذله احس يصلحلتس فهد الهريفي
عبيطه : اقول لاتذبين خلاص انا اسمي خالد تعرفين كل عيالنا اذا سالتيهم وش اسمك قال خالد !! << خلاص غيروا ترا ذا الإسم قديم شوفونا يالبنات ماعاد نقول ساره وريم صرنا نقول سكارليت ههههههههههه

قعدنآ نلف بالحآره وندور على بيتنآ <<مشكلة اللي اول مره ينحآشون
ووقت مآكنآ نلف شفت سيآرة ابوي وقفت عندالبآب من الخوف رحت له وسلمت عليه
قلت:لو سمحت لآتنآدي بنتك تسوي لك شآهي ترآي منقزهآ الليله وبتسهر معنآ وإذآ خلصنآ رجعتهآ
ابوي/ اتس اوووكي أهم شي إنتبه عليهآ ولآتسرعون..
انا:مآعليك لآتوصي .. يآلله برررب
البارت الثالث)

ابوي:تيت أقرب صبه
وخلإل مآحنآ نلف لقينآ عيآل يلعبون كوره بالبرحه اللي قدآم بيتنآ
وخذآنا الحماس ورحنا نشجع ..ربطت الثوب على خصري وكل مآجآت هجمه تحمست وإذآ التفت على خالد لقيتهآ مشغوله بجوآلهآ تحآول تستغل الفرصه وترقم
بين الشوطين جآ واحد من اللعيبه قآل:أنتو من الحآره؟
قلت:إيه أجل من سآحةالإقلآع!؟والله إنك تستهبل
قآم مد يده بيسلم ورجعت بحركه خآطفه لورآ وقلت:ابي امي ابي ابوي ابي ارجع بيتنآ لآمستحيل<<أحسبه مدهآ بيضربني
يوم مسك يدي عيآ يفكهآ حآولت اسحبهآ إلآ يوم شفت الرجآل غمض عيونه وخش جو
..اشوا إنه ماشاف المنآكير
قلت: هيه يآ ابو الشبآب يدي ابيهآ
قآل:إلآ مآتعرفنآ عالفطفوط
قلت:انا فزآع وذآ خويي خآلد وترآي أعرف اسم امه
قآل:ونعم .. انآ سربوت شآد البوت ..تلعبون معنآ؟؟
خآلد:لآ معليش ظهري يعورني<<يآي
أنآ:اوكي بلعب معكم بس بشرط! إللي ينهزم يشحن لي قصدي يعشينآ
سربوت :اوكي صآر
خالد:يالخبله لآتلعبين وتصدقين عمرتس والله إن تفضحينآ
قلت وأنآ اضرب على صدري:مآعليتس خويتس قدهآ أحلق حوآجبي إن مآجبت هدف
بعدين ترآي كلبو دآيم العب كوره بالحوش مع عيآل جيرآننآ <اوب السوآريه
الجروح اللي بسآقي مآجآت من فرآغ تقل كن لاعبين فيهآ x o
بدآ الشوط الثآني
وقآل سربوت: عيآل فيه وآحد دخل معنا بالفريق
وأنا كنت مستحي مره وبديت أصب عرق وأحط شعري ورآ إذني وأحس بذاك شسمه إيه المهم سمعت إثنين يتكلمون عني وعيونهم علي ويقولون شكله يقرب لهشام الرآشد وانا اسوي نفسي ماسمعت
صفر الحكم وبدا اللعب وقتهآ حسيت إنه جاوقت الجد وخفت وكنت أحاول إني مآ أستلم هجمه .. يوم جآت الكوره عندي توهقت وبغيت امسكهآ بيدي <<ياشين لعب البنات
بعدين غمضت عيوني وخذيت لحظة جلست اتذكر فيها كآبتن رابح وشلون كان يشوت الكوره قلت يابنت مابدهاش شدي حيلك كلهآ رفعة رجل
وأنا توني رافعه رجلي بشوت الكوره جاواحد من اللي كانوا يتكلمون فيني وكسرني .. تجمعوا العيال اللي يقول ضربة جزا واللي يقول سلامات حبيبي مو على بعضك سلامآت وجا سربوت وشافني طايحه وانا بين الوعي واللاوعي <<وخروا عني
شالني وحطني عند خالد على جنب وجلس يدلك رجلي ..الولد شك بوضعي يوم شاف الخلخال وبغى يتهور ويسوي لي تنفس صناعي لو مآ خالد مسكه ((الله ياخذك دايم تخربين علي أحلى اللحظات ))
بعد مآصحيت قلت وانا أرمش بعيوني :مشكور اخوي تسلم والله ماقصرت
قال:لاعادي شدعوه ماسوينا إلا الواجب ولو علي كان خذيت نشاط بعد مو بس واجب<<مع نظرة خبث
قلت بعد مآراودني الخوف وحسيت إننأ توهقنا : طيب حنا نستأذن وفرصه سعيده كانت أسعد اللحظات ((والله وتعرفين تصفين الحتسي ))
قآل :ويييييين ؟؟
لالا ماتروح العشا الليله وترا حنا إللي فزنا
أنا : لاتسلم خلها مره ثانيه .. وخالد تأشر لي من وراه يعني ياويلك إذا قلتي تم
وهو يحلف ويقول علي الطلاق وعلي الملازيم أن تعشون عندنا
وخفت بصراحه إنه جد يطلق مرته حرام وش ذنبها الضعيفه
قلت تم بس خلها بكره الليله مقدر عندي إرتباطات والشباب يحتروني ابجيبلهم العشا
قآل أوكي : اجل انا بمركم عشان نروح للإستراحه والعشا هناك وفلة حجاج
انا : خلاص والحلى علي
مشينا من عندهم وخالد معصب : زين كذا وهقتينا مع الرجاجيل .. افرضي صار عندنا ارتباط ولا وحده من خواتي تبي السوق شلون اتعذر منهم؟
انا : ياشيخه وسعي صدرك الرجال يقول فيه فلة حجاج يمكنهم جايبين بنات

رجعت البيت وكنت أحاول ادخل بهدوء لاينتبه لي أحد
لقيت ابوي قاعد عالزوليه بالحوش يعزف عالبيانو اشوا كان خاش جو ما أنتبه لي
بقى الجمارك اللي جوا ( امي )
أول ماشفتها وحسيت إني بتوهق قلت ابوي برا يناديتس وتراه مره معصب ابي أخرشها مادريت إلآ وهي شاطفتني من الخوف قصدي من الحب الزايد
دخلت غرفتي والحمد لله عدت الليله الأولى على خير


اليوم اللي بعدووو
نفس الحكايه لبست الثوب وعدلت الديزاين وطلعت
امي : على وين يانور العين
انا : ابد طال عمرتس بروح مع واحد ملعون والدين << كني حبيته
امي : يوه خلاص اجل .. كنت ابيك توديني لخالتك موضي بيجونها بنات خالة ابو جدي
انا : يمه الله يهديتس بلا حركات نص كم يعني مافيه إلا انا ماتخلون الواحد يطلع وهو مستانس قولي لأخوي يوديكم وخذي إبره معاكم لاتخلونها بالبيت < < كلك حكمه وذكاء
طلعت وجلست على عتبة الباب<<أخيرا تحققت امنيتي
كنت أحتري سربوت وعبيطه قصدي خالد مادريت إلا وأسمع صوت شربكة بواري بأول الحاره وانواع الجلنطات قدام بيتنا
ركبت قدام لان خالد من الذكاء راكبه ورا تحسبهآ بليموزين
وصلنا الإستراحه
خالد: من وين باب الحريم
سربوت :وشوله باب الحريم ترا مافيه عوايل
انا : هاه .. لايارجال ماعليك تراه كذا هو دايم من الظرافه يحب يستهبل ماعليك منها قصدي منه بس شكله يبي يجرب يدخل مع باب الحريم
بعد مادخلنا قال خالد: سربوت وين المرايآت ؟ <<ماتتوب
و والله ماقصر الرجال وصلنا لها وراح
(البارت الرابع والاخير )

خلنا الحمامات وضبطت الشماغ وخالد عدل القذله
طلعت من جيبي عطر قال خالد: معك كريم ؟؟ ضربت على خدي وقلت لاااا قهر نسيته بس معي علك تبي ؟
بعد التكشخ والتضبط دخلنا الخيمه وحنا متماسكين وكانت ملياااانه
قربت من خالد : أقول وين نجلس فيه والله إني استحيت
خالد فكيني بس بروح جنب ذاك المزيون يالله برب
انا تيت أقرب حضن عبد
وقفت وانا محتاره مدري وين أجلس مادريت إلا باللي ماسكني مع خصري
انا : من سربوت؟ الله جابك انا ماعرف احد من العيال وقاعد ادورك
سربوت : ماعليك بس تعال اجلس
جلسنا مع الشباب وسوالف وقهوه وبلوت
عاد انا صدقت نفسي مره قلت للي جنبي معك دخان
قال إيه سم
قلت لامعليش ماحب ذا انا ادخن دوفي دوف

قال لاوالله ذاك حق البزرنجيه
انا : وش تقصد ؟؟ لا قول قول
قال : ابد سلامتك يالمزيون
انا : إيه اشوا أحسب
واقول بنفسي((والله انت المزيون))


بعد ماتعشينا تجمعوا العيال برا الخيمه بيجلسون جلسة طرب
جلست على يميني المروس وعلى يساري خالد وبدا الطق
يوم بدا الحماس يزيد فيني رويدا شويه وقتهآ ماقاومت وقفت وربطت شماغي على خصري
خالد: فزاع تعوذ من الشيطان .. فزاع اهجد لاتفضحنا الله يرجك
انا: يارجال وخر فرصه تفوت ولا احد يموت
واستنزلت والشباب : اااحلللى
يارآيق يآهوووه وانا مغمضه اول مره ارقص عند شباب متعوده عالسحالي
فجأه مادريت إلآ باللي حولي قاموا يتناقزون من قدامي وصارت زحمه وإزعاج على بالي إن الشباب تحمسوا معي وانا مكمله وأوزع إبتسامات واسلهم بعوينآتي .. مادريت إلا باللي ماسكني مع علباي وله لحيه ومعه شرطه
انا : الشباب جايين يرقصون ؟ معليش لحد يحاول يحتك
إلا يوم عصب الرجال وشدني بقوه : ياقليل الأدب ماتخاف ربك
وقتها حسيت ان الرجإل جاد : انت ماتستحي تمسك بنات الناس ماعندك خوات؟
الرجال: اقول لايكثر يالله قدامي
ركبوني انا وخالد والشله بجمس وطول ماكنا بالطريق وانا اصيح والعن عبيطه
عبيطه: فزاع لاتبكي عيب الرجال يبكي
انا من بين دموعي وشهقاتي : أقول تغطي لاتصدقين عاد ولايكثر
أول مادخلت عالضابط جلست أبكي وفكيت الشماغ وقلتله والله مالي دخل عبيطه هي اللي قالت لي
الضابط فهى ومادرا وش السالفه قال أنتي وش جابتس مع ذولي
و علمته بالسالفه كامله
قام الضابط يهزأنا ويهاوشنا قدامهم وسربوت يدقني مع كتفي ويقول ترا رقمتس معي
انا : الوعد راس تنوره خخخ
بعدها دقوا على أهالينا
أول مادخل أبوي قال له الضابط خذ بنتك مسكناها مع شباب بإستراحه في وضع والعياذ بالله كانت ترقص<< اسلوب ترويع
ابوي : يووووووه اشوا إنها جت على كذا انا قلت الحين ماسكينهآ تدخن ولا تسرق مواتر
الله يهديكم بس تحبون تكبرون المواضيع
وطلعنا من القسم وسوا لي ابوي عشا وعزم جماعتنا وكانت هذي بداية الإنحراف
وبعدها صار لي ملف عندهم بالقسم وصرت مطلوبه أمنيا
تستاهلون أحد قالكم لاتق
بلو
ني بال[/size]جامعه
!!!!




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
رواية ليتني ولد كوميديه رائعه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى بويه :: القسم الأدبـي :: القصص والروايات-
انتقل الى: